Walter Benjamin

Dr Walter Bendix Schoenflies Benjamin (* 15. Juli 1892 z Berlin; † 26. Septämber 1940 z Portbou) isch e dütsche Philosoph, Literaturkritiker und Übersetzer vo de Wärk vom Balzac, Baudelaire und Marcel Proust gsi. Dr Benjamin het mit de Kommuniste sympatisiert, isch aber nie Bardeimitgliid worde. Wo d Nationalsozialiste 1933 d Macht ergriffe hai, isch er uf Baris ins Exil gange. Dört het en d Hannah Arendt materiell understützt. Wo dr Chrieg usbrochen isch isch er zerst interniert worde. Denn het er brobiert über Spanie und Bordugal in die Vereinigte Staate z emigriere. Er isch aber festgnoh worde und grad won er an die Dütsche hätt sötte usgliiferet wärde, het er sich s Läbe gnoh.